काठमाण्डौं । छठ पर्व मनाउनका लागि काठमाण्डौं स्थित रानीपोखरी खोल्न कसैले पनि माग नगरेपछि यसवर्षको छठ पर्वमा पनि रानीपोखरी खुलेन ।
२०७२ सालको भूकम्पले रानीपोखरीमा क्षती पुर्याएपछि बन्द भएको थियो । अहिले रानीपोखरीको पुनर्निमार्ण सम्पन्न भएता पनि छठ पर्व मनाउनको लागि कसैले पनि रानीपोखरी खोल्नुपर्ने माग नगरेकै कारण यसवर्ष पनि नखुल्ने काठमाण्डौ महानगरपालिकाले जनाएको छ ।
भुकम्पले क्षती पुर्याएको रानीपोखरी गएको वर्ष पनि पुनर्निर्माणको काम भैरहेको र महानगरलाई हस्तान्तरण नगर्दा खुलेको थिएन । यसवर्ष महानगरले छठका लागि कमलपोखरी र जलाशयलाई सरसफाइ गर्ने काम सकेको महानगरका प्रवक्ता नवीन मानन्धरले जानकारी दिए । उनले छठ पर्वको अवसरलाई मध्यनजर राखी आवश्यक शान्तिसुरक्षा समेत मिलाइसकिएको बताए ।
