रामेछाप । मन्थली नगरपालिका–७ भटौलीमा सोमवार विहान बागमती प्रदेश ०१–००६ ख ३८३९ नम्बरको टिपर दुर्घटना हुँदा टिपर चालकको घटनास्थलमा नै ज्यान गएको छ ।
ज्यान गुमाउनेमा टिपर चालक २० बर्षिय पवित्र बस्नेत रहेका छन् । सोही टिपरका सह–चालक दोलखा दोलखा तामाकोशी गाउँपालिका–६ च्यामा बस्ने अन्दाजी २१ बर्षिय मनोज फुयाँल गम्भीर घाइते भएका छन् । उनको घटनास्थलवाट उद्धार गरी हाल मन्थली अस्पतालमा उपचार भइरहेको छ ।
मन्थली नगरपालिका–७ भटौलीको तामाकोशी नदीको पोडेदहबाट बालुवा लोड गरी सदरमुकाम मन्थली तर्फ आउँदै गरेको उक्त टिपर पिपलवोट नजिकैको सडकवाट करीव ५० मिटर तल नदी किनारमा खसेको थियो । घटनाको बिषयमा थप अनुसन्धान भइरहेको जिल्ला प्रहरी कार्यालय रामेछापका प्रहरी नायव उपरीक्षक प्रदीप कुमार सिंहले जानकारी दिए ।
