रामेछाप । गोकुलगंगा गाउँपालिकाले आइतबार एक औपचारिक कार्यक्रमको आयोजना गरि आगामी आर्थिक वर्ष २०८०÷८१ को लागि ७४ करोड ४२ लाख ९३ हजार २ सय रुपैयाँ बरावरको वजेट ल्याएको छ ।

उक्त वजेट गाउँपालिको १३ औं अधिवेशनमा पालिकाकी उपाध्यक्ष उषादेवी कार्कीले सार्वजनिक गरेकी हुन् । प्रस्तुत बजेटमा सङ्घीय सरकारबाट ५८ करोड ९८ लाख ३५ हजार ७ सय, बागमती प्रदेश सरकारबाट ८ करोड ९७ लाख ३५ हजार ७ सय २५ रुपैयाँ र आन्तरिक स्रोततर्फ जलविद्युत रोयल्टीबाट ५ करोड ५० लाख तथा विभिन्न कर शुल्क लगायतबाट ४ करोड ३७ लाख ७ सय गरी ९ करोड ८७ लाख २१ हजार ७ सय ७५ रुपैयाँ प्राप्त हुने अनुमान गरिएको छ । आगामी वर्षको लागि ल्याइएको वजेटमा पालिकाले पुँजीगत खर्चमा वृद्धि र गुणस्तरीय पूर्वाधार निर्माणलाई विशेष प्राथमिकतामा राखेको छ ।

अधिवेशनमा गाउँपालिकाका अध्यक्ष काजीबहादुर खड्का (दिनेश) ले पालिकाले आगामी आर्थिक वर्षका लागि सुशासन,सार्वजनिक खर्चमा मितव्ययिता, पुँजीगत खर्चमा वृद्धि, गुणस्तरीय पूर्वाधार निर्माण, शासकीय व्यवस्था र सेवा प्रवाहमा सुधार, भ्रष्ट्राचार नियन्त्रण, उत्पादन र रोजगारीमा वृद्धि, पर्यावरणीय सन्तुलन जस्ता विषयहरू प्रमुख प्राथमिकतामा राखेको जानकारी दिए । उनले प्रस्तुत गरेको नीति तथा कार्यक्रममा भ्रष्टाचारविरुद्ध शून्य सहनशीलताको नीतिलाई कडाइका साथ कार्यान्वयन गर्दै सबै किसिमका अनियमितता, भ्रष्ट्राचार, कर छली, कृत्रिम अभाव कालो बजारी, व्यावसायिक एकाधिकार जस्ता क्रियाकलापलाई निस्तेज पार्दै लैजाने बताए । त्यस्तै नागरिकबाट आउने गुनासोलाई प्रभावकारी रूपमा सुनुवाइ गरी उचित दण्ड सजाय र कानुनी उपचार गरिने पनि नीति तथा कार्यक्रममा उल्लेख गरिएको छ ।

कृषि तर्फ गाई भैँसी पालनको कामलाई प्रोत्साहन गरी दूधजन्य पदार्थको खपत र बजारीकरणका लागि ‘कोल्ड ड्रिङस भगाऊँ, दही मोही खाऊँ’ को नारालाई सार्थक बनाउन गाउँपालिका भित्रने चिसो पेय पदार्थको आयातलाई बिस्तारै निरुत्साहित गरिने नीति तथा कार्यक्रममा समावेश गरिएको छ । त्यस्तै गाउँपालिका तथा वडा कार्यालयहरूमा समेत गुनासो सम्बोधनका लागि गुनासो सुन्ने अधिकारी तोकी मोबाइल गभर्नेन्सको व्यवस्थाका साथै हेलो स्थानीय सरकार सञ्चालनको व्यवस्था मिलाइने, सर्वसुलभ र गुणस्तरीय शिक्षाको अवधारणा बमोजिम शिक्षा क्षेत्रलाई अगाडि बढाउन विद्यालय उमेर समूहका सबै बालबालिकालाई विद्यालयमा ल्याउने,सिकाउने र टिकाउने कार्यलाई अभियानका रूपमा सञ्चालन गर्ने जनाइएको छ ।

बढ्दो शैक्षिक बेरोजगारीलाई न्यूनीकरण गर्न तथा हाम्रो स्कुल राम्रो स्कुल अभियान अन्तर्गत विद्यार्थी अनुपातमा शिक्षक दरबन्दी न्यून रहेका सामुदायिक विद्यालयहरूमा स्वयम सेवक शिक्षकको रूपमा विषयगत दक्ष शिक्षकको व्यवस्था मिलाइ विद्यालय सञ्चालन र पठन पाठनको प्रबन्ध मिलाइने पनि नीति तथा कार्यक्रममा उल्लेख गरिएको छ ।स्वास्थ्य संस्थातर्फ सबै वडामा आधारभूत स्वास्थ्य परीक्षण तथा उपचार सहितको स्वास्थ्य सेवा उपलब्ध गराई गुणस्तरीय स्वास्थ्य सेवामा सबै नागरिकको पहुँच सुनिश्चित गर्ने, शक्तः असहाय र ज्येष्ठ नागरिकलाई घरदैलोमै आधारभूत स्वास्थ्य सेवा प्रदान गरिने छ । त्यसैगरी पालिकाले ‘युवासँग स्थानीय सरकार– हुने छैनन् बेरोजगार’ अभियान अन्तर्गत प्रधानमन्त्री रोजगार कार्यक्रम र निजी क्षेत्रसँग सहकार्य गर्दै उत्पादनसँग प्रत्यक्ष जोडिने खालका रोजगार, उद्यमशीलता र सीप विकास तालिम समेत संचालनमा ल्याइने उल्लेख गरिएको छ ।

कृषितर्फ निजी एवं खाली पर्ती जग्गामा कृषि खेती प्रोत्साहन कार्यक्रम सञ्चालन गरी रोजगारीको व्यवस्था मिलाइने, हाम्रो उत्पादन हाम्रो अभियान अन्तर्गत एक टोल एक सामूहिक कृषि उत्पादन, एक वडा एक विशेष उत्पादन र एक पालिका एक उत्पादन क्षेत्र नीति मार्फत आत्मनिर्भर स्थानीय अर्थतन्त्रको आधारशिला निर्माण तय गरिने उल्लेख छ । त्यस्तै गाउँपालिकाभित्र रहेका ऐतिहाँसिक पाँच पोखरी जट्टापोखरी, ताँबेडाँडा, भिमसेनथान, बोहोरीगंगा, शिवालय जस्ता ऐतिहासिक,धार्मिक, सांस्कृतिक र पुरातात्त्विक स्थलहरूलाई धार्मिक पर्यटन सँग जोड्दै सङ्घ, प्रदेश र निजी क्षेत्रसँगको सहकार्यमा ‘हाम्रो सम्पदा राम्रो सम्पदा’ कार्यक्रम सञ्चालन गर्ने नीति पनि गोकुलगंगा गाउँपालिकाले अवलम्वन गर्ने भएको छ । त्यस्तै विगत वर्षहरुमा भएका अन्य कार्यक्रमहरुलाई पनि नियमितता गर्दै जाने जनाइएको छ ।

पालिकाको सभाहलमा भएको १३ औं अधिवेशनमा गाउँपालिकाका प्रमुख प्रशासकिय अधिकृत होमवहादुर थापा, सवै वडाका वडा अध्यक्ष र सदस्यहरु,विभिन्न राजनितिक दलका प्रतिनिधिहरु, संञ्चारकर्मीहरु र नागरिकहरुको समेत उपस्थिती रहेको थियो ।