रामेछाप । भारतको राजस्थान क्षेत्र आसपास रहेको न्युन चापीय प्रणालीको प्रभाव र पश्चिमी वायुको प्रभावले आज देशका विभिन्न स्थानहरुमा आंशिक देखी सामान्य वर्षा र हिमपात हुने जल तथा मौसम विज्ञान विभागको मौसम पूर्वानुमान महाशाखाले जनाएको छ ।
मौसम पूर्वानुमान महाशाखाका अनुसार देशका अधिकांश स्थानमा आंशिकदेखि सामान्य मौसम बदली हुनेछ भने दिउँसो मधेश, बागमती, गण्डकी र लुम्बिनी प्रदेशलगायत देशको पहाडी भूभागका एक–दुई स्थानमा सामान्य वर्षात समेत हुनेछ । त्यस्तै देशका उच्च पहाडी तथा हिमाली भूभागका थोरै स्थानमा सामान्य हिमपातको सम्भावना रहेको छ ।
त्यसैगरी राति कोशी र गण्डकी प्रदेशको उच्च पहाडी तथा हिमाली भूभागका एक–दुई स्थानमा सामान्य हिमपात हुनेछ । त्यस्तै भोलि (शुक्रबार) गण्डकी, कर्णाली र सुदूरपश्चिम प्रदेशका पहाडी भूभागका एक–दूई स्थानमा हल्का वर्षा र उच्च पहाडी तथा हिमाली भूभागका एक–दुई स्थानमा हल्का हिमपात हुनेछ ।
