रामेछाप । खेत जोत्दै गर्दा हाते ट्याक्टर दुर्घटनामा परि उमाकुण्ड गाउँपालिका–२ वाम्तीभण्डारका निरकुमार कार्की गम्भिर घाइते भएका छन् ।
उनको अवस्था गम्भिर भएकाले जिल्लामा उपचार सम्भव नभएपछि हेलिकोप्टर मार्फत थप उपचारको लागि काठमाण्डौं पठाइएको छ । शनिवार दिउँसो कार्की वाम्तीको पर्दिङ भन्ने स्थानमा आफ्नो ट्याक्टर लिएर छिमेकी गजेन्द्र बस्नेतको खेत जोत्न गएका थिए । खेत जोत्दै जाँदा ट्याक्टरको जोत्ने दाँती घाँसमा बेरिएर अकस्मात ट्याक्टर अनियन्त्रित भई पल्टिदा ट्याक्टर चालक कार्की पनि ट्याक्टर सँगै पल्टिएका थिए । उनी लडेकै ठाउँमा आएको ट्याक्टरले उनको छाती, घाँटी र मुखमा गहिरो चोट लागेको हो ।
घाइते कार्कीको स्थानियहरुले तत्काल घटनास्थलवाट उद्धार गरी उपचारको लागि बाम्ती प्राथमिक स्वास्थ्य केन्द्रमा भर्ना गरिएको थियो । उनको उक्त स्वास्थ्य संस्थामा उपचार सम्भव नभएपछि थप उपचारको लागि हेलिकोप्टर मार्फत काठमाण्डौं पठाइएको वाम्ती प्रहरी चौकीका प्रमुख भुवन श्रेष्ठले जानकारी दिए ।
