रामेछाप । मन्थली नगरपालिका–९ पुरानागाउँका वडा अध्यक्ष गोकर्णराज आरण र वडा सचिव रमेश सुबेदीले किर्ते कागजात बनाई खेलकुदको रकम अनियमितता गरेकाले कारर्वाहीको माग गर्दै जिल्ला प्रशासन कार्यालय रामेछापमा उजुरी परेको छ ।

वडा अध्यक्ष आरण र सचिव सुबेदीले चालु आर्थिक वर्ष २०८१÷८२ मा खेलकुद शिर्षकमा विनियोजन गरेको रकम वडामा कुनै पनि खेलकुदका कार्यक्रमहरु नै नगरी कार्यक्रम सम्पन्न भएको भन्दै किर्ते बिल भर्पाइ निमार्ण गरी एक लाख ५० हजार रुपैयाँ मन्थली नगरपालिकावाट वडा सचिव सुबेदीले भुक्तानी लिएको भन्दै उजुरी परेको हो ।

वडाको खेलकुद क्षेत्रमा आएको उक्त रकमबाट एउटा पनि खेलकुदका कार्यक्रमहरु नै नगरी वडा अध्यक्ष र सचिवले मनोमानी ढंगले कानुन विपरित फर्जी विल भर्पाई निमार्ण गरी रकम अपचलन गरेकाले आवश्यक कार्वाहीको माग गर्दै आफुले बाध्य भएर जिल्ला प्रशासन कार्यालयमा उजुरी दर्ता गर्नुपरेको पुरानागाउँ वडा खेलकुद विकास समितिका अध्यक्ष प्रकाश सोडारीले जानकारी दिए ।

उनले भने– वडामा खेलकुदको लागि विनियोजन गरेको रकमले खेलकुदका कार्यक्रमहरु गर्नुपर्ने हो । खेलकुदको क्षेत्रमा आएको वजेटको बिषयमा जानकारी नै नगर्ने र काम पनि नगरी फर्जी विल भर्पाइ निमार्ण गरी रकम अपचलन गर्दा पुरानागाउँका आम खेलकुद प्रेमी युवायुवतीहरु मारमा परेका छन् । खेल क्षेत्रमा लाग्नेहरुले वडामा कुनै पनि खेलकुद सम्वन्धि कुनै पनि कार्यक्रमहरु नहुँदा उनीहरुमा निराशा उत्पन्न भएको अध्यक्ष सोडारीले बताए ।

यस चालु आर्थिक वर्षमा पुरानागाउँ वडा कार्यालयले एक लाख ५० हजार रुपैयाँ नगरपालिकाबाट भुक्तानी लिएको मन्थली नगरपालिका–९ पुरानागाउँका वडा सचिव रमेश सुवेदीले जानकारी दिए । उनले भने खेलकुद कार्यक्रम भए अनुसारको रकम हामीले नगरपालिकामा माग गरेको र सोही अनुसार भुक्तानी आफुहरुले लिएको बताए ।

गएको आर्थिक वर्ष २०८०÷८१ मा पनि पुरानागाउँका वडा अध्यक्ष आरण र सचिवले खेलकुदको लागि विनियोजन भएको ४ लाख मध्येबाट २ लाख मन्थली नगर कप, एक लाख राष्ट्रपति रनिङ शिल्डमा खर्च गरेको र बाँकी एक लाख रुपैयाँ शिर्षक परिवर्तन गरी लैङ्गिक हिंसमा खर्च गर्ने गरी छुट्टाइएको थियो । विनियोजन गरेको रकम खर्च नभएपछि पुनः राज्यकोषमा नै फर्काइएको मन्थली नगरपालिका–९ पुरानागाउँका वडा अध्यक्ष गोकर्णराज आरणले जानकारी दिए ।

वडामा खेलकुदको लागि रकम वर्षेनी विनियोजन गरेता पनि खेलकुदका कुनै पनि कार्यक्रमहरु नहुँदा आम खेलप्रेमीहरुमा नैराश्यता छाएको छ । वडामा न त खेलकुदै मैदान नै छ । न कुनै खेलकुदका सामाग्रीहरु नै खरिद हुन्छ । खेल क्षेत्रमा आएको वजेट वर्षेनी बन्द कोठामा कागजात निमार्ण गर्ने र सक्ने गर्दा आफुहरुलाई दुःख लागेको खेलाडीहरु बताउँछन् ।